هرج اهل الحجاز << فلللللة بمعنى الكلمة

لهجة أهل المنطقة الغربية في السعودية وتتمركز بالذات في مكه وجده والمدينة
والقرى القريبة منها اكثر من باقي المدن اللي في الغربية وهي لهجة تأخذ من اللهجة
البدوية و اللهجة المصرية.
وطبعا تختلف لهجة العجايز عن الجيل الحاضر ..
لهجة العجايز تحسوها معتقة ومصطلحاتها القديمة ما تنفهم وما يستخدموها الا عتقية
البلد اما الشباب حقون دحين ما عاد صار يستخدموها . وكمان ما ننسى ان اللهجة
الحجازية فيها الكثير من الأمثال القيمة


وبسم الرحمن نبدأ في بعض ما تختص بيه لهجتنا الحجازية الغاليه :
مصطلحاتنا :


في كثير من المصطلحات الحجازية اللي من الصعب انو اي واحد غير حجازي يفهمها
واتفضلوا هذي بعضها :




دحين ---> دلوقتي ^^ الآن


روق ---> ريح يعني روق اعصابك وفي ناس كتير يقولو روق المنقا والمنقا هيا المانجو بس بالحجازي والقصد انو تروق دماغك ^^


استنى ---> انتظر ومنها تجي تصريفاتها مستني وبأستنى ...


دوبي , دوبني ---> معناها لساعي دوبي سويت هادا الشي يعني مسلا دوبي رجعت من السوق يعني قبل شويه رجعت من السوق


لسه , لساع ---> يعني ماسويت هادا الشي لسع ^^


ابغى واحيانا تجي بدي ---> اريد وممكن تختصر وتسير بدل ابغى ابى مو ابي لا ابي حقت النجديين واللي كدا بس ابى بالالف المقصوره من باب التخفيف شلنا حرف الغاء لانو تقيل ع اللسان ^^


امكن , بلكن ---> يمكن وكمان ممكن تجي يمكن


طرطوش , طرطوشه ---> وهادي صفة معناها درويش او مايعرف يتصرف وساير مخفه


الصمرقع ---> يعني لمن نقول جبلي ( جاب لي ) الصمرقع يعني جبلي القرف والهجوله


مخمج , مقطن ---> يعني معفن وطلعت ريحتو


خنفشاري ---> معنها شي رهيب وحلو وغريب كدا ^^


ازهمي ---> معناها نادي


مفصعنه ---> متفشخره و مدلعه بزيااده وامكن تجي قويه المهم صفه مو حلوه ^^


ادّيني ---> ناولني او اعطيني


ودّيني ---> يعني وصلني ومنها تجي تصرفيات ودّاكي .. مسال : مين ودّاكي اليوم ؟ وداني اخويا ^^


اتلحلح ---> يعني اتشطر او اتحرك


هرجه ---> موضوع نهرج فيه


خُــش ---> ادخل


وش , جمعها وشوش^^ ---> وجه , وجوه


مغراف ---> يعني شي ينغرف فيه يكون اممم يعني وعاء كدا كبير



قونيلا ---> ومعناها تنوره


دِفِـش ---> يعني عفش وعكس ناعم


سييب , سيبو ---> اتركو


عبال . عبالو ---> في الوقت اللذي .. مسلا اقول عبال ما تخدلك دش اكون سويت الغدا زي في الوقت اللي انت تاخدلك فيه دش اكون سويت الغدا


اتشعبط ---> اتسلق



لو تنطنط , لو تسير عشره , لو وقفت على يدك ---> يعني من سابع المستحيلات مسلا والله ما اخرج معاكي لو تنطنطي ^^


ست ستيته , ست هانم ---> باللبناني خانو هيا كلمة توبيخ زي لمن نقول ليش ما حليتي الواجب يا ست هانم !!


وفي كلمه دايمن دارجه على اللسان الحجازي لمن يشوف شي ما عجبو


او فيه غلط ولا في حاجه نقوول وه يا ندامه ^^ يعني ياندامه على اللي شفتو !!


اندر بره : اخرج
العن سنسفيلك : اهزأك
اديلو : اعطيه
الدهليز : مدخل البيت
الكرتة : الفستان
الكنتره : الجزمة اكرمكم الله
القنعه : العبايه
الكرويتة : دكة خشبية
الزقاق : الشارع الضيق


وأعتقد أنها أصبحت كلمة معروفة بفعل النزح المكاوي على المدن الأخرى، وهو
المعروف عند أهل نجد بالدعتسوس الداعوس <---- زقاق أهون وربي
باختصار هو الشارع الضيق


دندرمة : ايس كريم و تراها مي سبّة تراها كلمه معروفة جداً، وبعد دخول التطور إلى
الحواري المكّاوية أصبحت تعرف بالآيس كريم
دحديرة : نزلة او منحدر
الدبش : اغراض العروسة قبل لا تتزوج
القابلة : بكره = اللي تولد الحوامل
المملك : المأذون الشرعي
الدقيسي :الفراغ اللي تحت الدرج أو المخزن
المرقعة : الدلع والمياعه في الكلام والتصرف
يتتريق : يستهزء
اللغوصة : نقل الكلام وتسبيب المشاكل
الدحلسة : اذا كنت بتتمصلح مع واحد عشان تبغى منه شي تقول يدحلس .
هججوني : ازعجوني
قوامن : بسرعه , حالاً
مضليون : طبعاً الكلمة هذي تحفة اللهجة المكاوية، وكانت النساء تتفاخر بمن تملك
فيهن مضليون و المضليون هو البروش الألماس
الحرمصة: يقولك في غابر الغابرين ( واحد متحرمص على نتيجته) والمعنى العلمي لها
هو عدم الاستقرار النفسي أو انتظار الشيء على أحر من الجمر
المرمشة: يمين بالله علينا كلمات فلّه
المرمشه: بفتح الميمين هي نهش ما على العظام من اللحم، أو نهش ما على أي
شيء من أي شيء
الزبلحة: ياساتر على الكلمات اللي تودي فدهية، المهم الزبلحة هي قلة الأدب والتواقح
في الكلام
العكننه : وهي التنكيد على شخص معين،
و في مصطلحات كتيرررررررررر غيرها .




2- أمثال حجازية :


إذا جيت رايح كتر من الفضايح.
او إذا جيت رايح كتر من الملايح
بعد ما أكل واتكا قال ريحته مستكا.
حاجه ما تهمك وصي عليها جوز أمك.
ست وجاريتين على قلي بيضتين.
أعمى ويلضم خرز.
دلع الكبار زي الشقدف على ال****
يضرب هذا المثل لخروج العجوز عن وقاره وجديته
والشقدف عشان الاسئلة بس:ما كان يوضع على الجمل ليجلس فيه المسافرون
اللي ماله أم حاله يغم.
كنس بيتك ورشُه ما تدري مين يخشوا.
الخايبه تتعلق بالحبال الدايب.
أهري وانكتي يا جاره وأنا ثابته زي العماره.
شايل لنا طيران عبد القادر
لو لك شي عند ال,,,,,,,,,,,, قول له يا سيدي
لا تقرصيني يا نحله ما أبغالك عسل..
يحسدوا الفقير على موتة الجمعه
سكتنا له دخل ب****ووو
ما يقدروا على ال**** يقدروا على البردعة
اذا حلقوا لغيرك بل راسك واستنى
ايش عرف الحمير بأكل الجن,,,,,,,,,,,,ل
البيض الفاسد يدحرج على بعضه


اذا تعاندوا الحمير يا بخت الركاب


البيضه ما تخابط حجر


حبيبك يمضغ لك الزلط وعدوك يعد لك الغلط


****تك العرجة تغنيك عن سؤال اللئيم


داخل لبيت العروسه نادر من بيت العريس


ياريتني بيضه وعرجه اصلوا البياض فرجه(بضم الفا).


يااخد القرد بماله يروح المال ويبقا القرد على حالو


الله من محبته في عبيدو جعل العمر والرزق بيدو.


اللي يشوفني بعين اشوفوا باتنين.


مين يشوفك يالي في الضلام تغمز


على قد زيتوا سرجلوا


ماتعرف خيري لين ماتجرب غيري


عقربة في الغار ولا ضُرة في الدار


فقير اتجوز فقيرة خلفوا وجع القلب


كبيرهم فلفل وصغيرهم زنجبيل واللي في الكوفلة يقول من العايدين


خاتم بفصو وكل شيء ترصوا


خشوني لاتنسوني ولعوا الشمعة وشوفوني


عمية تحفف مجنونة وتقولها حواجبك سودا ومقرونة


الصرمة والقبقاب صاروا أصحاب


يا داق الموية في المهراس يا مربي وليد الناس


كل عيش البخيل ولا تأكل عيش المنان


أدب ولدك وان زعلت امه


يا اما طوخو يااما اكسر موخو


مااخس من زيد الاقديد




يابخت من بكاني وبكى الناس عليه ولا من ضحكني وضحك الناس عليه.


رضينا بالهم والهم ما رضي بينا


اتملت العدوة وقلت المروه


أكلوا الملوخية وصاروا أفندية


لمن كنا ما كانوا ولمن رقدنا قاموا


قالوا متى طلعت القصر قالوا أمس العصر


العروسه للعريس والجري للمتاعيس


سلامتك والهيل والقرنفل قمامتك


اللي يشيل قربه مخروقه تنقط على راسه


الحجر من الارض والدم من راسك


أخوانك من أمك زي الدهب في كمك و أخوانك من أبوك زي القوم لما ينهبوك
من بيت أصقع لبيت أرقع


مطبق العاده و معصوب كل يوم
ههههههههههههههههههههههههه


في كل محضر بالتوب الاخضر
باب المجلس يقول باب السطوح .. اللي يجي يجي .. واللي يروح يروح


خليها في القلب تجرح و لاتخرج بره ترمح
الحر من غمزة وال**** من رفزه
يضرب هذا المثل لايضاح الفرق بين النبيه والبليد.
**** الحكومة حكومة
يضرب هذا المثل للموظف الصغير المتسلط على الناس


خطبوها اتعززت تركوها اتندمت
يضرب لمن يتظاهر بعدم الرغبة حينما يعرض عليه امر ولكنه يندم بعد فوات الاوان


كل حبه مسوسه لها كيال اعور
قلبي على ولدي انفطر وقلب ولدي عليا حجر.


و لا تنسوا ارضى بقردك لايجيك اللي أقرد منوو
الحب عياقة ...توب بلا ياقة


كمان الحجازيين فيهم اخلاق و احترام مافي بعدها


لما يطلب منك سكينه ايش يقول ؟
يقولك الله يخليك اديني سكينة في قلب العدو
لما يقلك كنت بأكل
يقلك كنت ب أتعشى مثلاً فضله خيرك


اشياء و تراجمها :


بيت الما: وهو ما يعرف حاليا (بدورة المياه) وقد سماه الجيل الصاعد الجداوي الآن
(الطهارة) وقد ورد انه تم التسمية هذه على أساس انه مكان كبير في البيت يوجد فيه
الماء فسمي بـ بيت الما.
المركّب: بتشديد الكاف، وهو ما يسميه جميع الناس الآن (المطبخ) والى الآن يعتبر علماء
اللغة العربية هذه التسمية من عجائب التسميات لأنه لا يوجد سبب معروف للتسميه
هذه إلى الآن!!!!
الدقيسي: بتشديد الدال وكسرها وكسر السين، وهو ما يعرف بالمستودع ، يقول الكاتب
المكاوي (محمد يواد فلاته) أن التسمية تعود إلى الحرب العالمية الأولى حيث استخدم
أول مره كمخزن للذخائر وسمي في مكة بالدقيسي ، وقد قام جيل 2000 من شباب
وشابات مكة بتسميته بالمخزن بدافع التطور.
القرندي: بفتح القاف والراء وتسكين النون وكسر الدال <<<مشوار ها؟
وهذا نوع من أنواع مداعبة الأب الجدااوي لابنه فعندما يناديه ويتأخر 3 ثواني يقله
(بسرعة عساك القرندي)
ويفسر علماء الجن أن القرندي نوع من أنواع الجن وببساطه يدعي الأب على ابنه
بالقرندي <<شفتو اللطافه.
الفقده:مفعول عشانه من فعل يفقد، وهذا نوع آخر من أنواع المداعبة وهي الخاصة بالأم
المكاويه.
حيث تداعب أولادها بـ (تعال الله يفقدك)
توتوا: وهو نوع من أنواع المعادن المكتشفة في الاوديه الجداويه. ويستخدمونها المكاوية والجداويين
في تصنيع نوعين من الأشياء اللي تنحط فيها مويه للشرب وهو ما يسمونها زينا
(الكاسه) ومو زينا (المغراف).
المغراف:هو نوع من أنواع الكاسات التوتوا ، في حين انه تمت إضافة معلومة من علماء
الجن المذكورين سابقا
انه في مرة من المرات قامت أم تداعب ولدها لصغير (الشقي) اللي يلعب يالمغراف
وقالتله الله يفقدك بس
وبعدين قالت خلاص يامغراف خده وفي لمح البصر اختفى الولد ، والمغراف هو نوع من أ
نواع الجن
وكان بالصدفة متواجد في جده ومكه هذا الجني ههههههههههههههههههههه


على طبطابي .. : يعني على مزاجي :
مِرَسْتَكَه ..: يعني متأنتكه يعني مرة شياكة .. ومرتبّة


وايق : .... يعني طالع .... يعني مثلاً تقول .. : ( ياواد وايق زي الناس لا اهبدك باتقل شي
قدامي .. و لا أهبدك اللين أجدد ايمانك


تزل ... : يعني تمر
مرحبمبك ... : يعني مرحبا بك .. بس باختصار شوية
باطِرمَة ... : يعني جلسة ... كنب حاجة زي كده ...
كَرَاوِيتَه : ... حاجة خشب كده ... يحطوا عليها الباطرمة ....
مَدَارِيْه : ...... مراجيح ...
ندرت عينك من حُقّها ... : يعني خرجت عينك من محلها .... كده ::]
شَلْمَه ...: يعني فجعه .. يعني مثلاً تقول ( اشبك ياواد مشلوم كده عالاكل ؟؟ ) .. ::]
قيّسْتَك : ... يعني حسّبتك .... توقعتك .... هقيتك
يعني مثلاً .. ( قيستك ياواد حتزل على عمتك فتّو ) ... وه ياستيته ..
بُخْنُق ... : اللي يتلبس في الراس ويكون مخيّط على قده .... :
مِدَهْمَلْ : .... يعني مبهدل .... يعني مثلاً ( اشبك ياواد مدهمل كده .. لاتكون كنت بتلعب
في المداريه ) ؟؟ :-
دهليز : يعني سيب (... سيب وانا اسيب )..... يعني محل كده زي اللي يكون قدام ابواب
العماير
من جوّه
زنبيل : ... يعني كيس ... : زلطة : .... سَلطة بعد التعديل ...
يدعك : ... يعني يفرك ... يعني مثلا .. ( ايش بتسوي يابت : ... بادعك الاسورة : ..
روحي يابت عساكي بداعوك يدعك مصارين شيطانك غسلي الصحون بدل مانتي
قاعدتلي كده لاشغله ولا مشغله



وبث خلصت هرجي

أن شاء الله الموضووع يعجبكم ..

مشكووور يعطيك العافيه اخوي

ههههههههههههههه والله كلمهم آم الفـــــــــــــــــــــله


يعطيك العااااااااااافيه

خنفشاري ---> معنها شي رهيب وحلو وغريب كدا ^^
اماااااااااااااااااااااااا ذي هههههههههههههههههه
مشكور ع الموضوع

مشكووورين ع مروركم المميزه


ههههه ردودكم تضحك <<<< دعابه دعابه